ក្រុមហ៊ុន​ឯកជន​មួយ​អះអាងថា​រកឃើញ​យន្តហោះ MH370 ក្នុង​ឆកសមុទ្រ​បេង​ហ្គា​ល់​

ក្រុមហ៊ុនឯកជនមួយអះអាងថារកឃើញយន្តហោះ MH370 ក្នុងឆកសមុទ្របេងហ្គាល់

ក្រុមហ៊ុនអូស្ត្រាលីមួយនិយាយថាខ្លួនបានរកឃើញទីតាំងបំណែកយន្តហោះពាណិជ្ជកម្មមួយស្ថិតនៅបាតមហាសមុទ្រឥណ្ឌាក្នុងឆកសមុទ្របេងហ្គាល់ (Bay of Bengal) ជាតំបន់មួយស្ថិតនៅជ្រោយខាងជើងនៃតំបន់ស្វែងរកមុនដំបូងបង្អស់ ប៉ុន្តែស្ថិតនៅរាប់ពាន់គីឡូម៉ែត្រពីកន្លែងដែលពួកអាជ្ញាធរកំពុងផ្តោតថ្មីៗនេះ។

យោងតាមវេបសាយដេលីមែលចេញផ្សាយថ្ងៃទី ២៩ ខែមេសា ក្រុមហ៊ុនបច្ចេកវិទ្យា GeoResonance បានអះអាងថា បច្ចេកវិទ្យា Sensor របស់ខ្លួនបានរកឃើញបំណែកយន្តហោះមួយនៅក្នុងឆកសមុទ្របេងហ្គាល់ ស្ថិតនៅភាគខាងត្បូងប្រទេសបង់ក្លាដែសប្រមាណ ១៩០ គីឡូម៉ែត្រ។

ក្រុមហ៊ុន GeoResonance អះអាងថាពេលកំពុងស្កែនមើលរ៉ែស្រាប់តែប្រទះឃើញយន្តហោះពាណិជ្ជកម្មមួយនៅបាតសមុទ្រមហាសមុទ្រឥណ្ឌានៅតំបន់ឆកសមុទ្របេងហ្គាល់

ក្រុមហ៊ុននេះនិយាយថា រូបភាពដែលថតនៅចំណុចដូចគ្នាកាលពីប្រាំថ្ងៃមុននេះបានបង្ហាញថា យន្តហោះនេះបានបង្ហាញខ្លួននៅចន្លោះថ្ងៃទី ៥ និង ១០ ខែមីនាឆ្នាំ ២០១៤។ យន្តហោះម៉ាឡេស៊ីបានបាត់ខ្លួននៅថ្ងៃទី ៨ ខែមីនា។

ក្រុមហ៊ុន GeoResonance បាននិយាយក្នុងសេចក្តីថ្លែងការណ៍មួយថា “ក្រុមហ៊ុនមិនប្រកាសថានេះគឺជាយន្តហោះ MH370 ទេ ទោះយ៉ាងណាវាគួរតែត្រូវបានធ្វើការស៊ើបអង្កេត”។

នាយកក្រុមហ៊ុន លោក ដេវីត ប៉ូប (David Pope) បាននិយាយថា លោកគ្រាន់តែទម្លាយព័ត៌មាននេះជាសាធារណៈបន្ទាប់ពីលោកមានអារម្មណ៍ថាពួកអាជ្ញាធរមិនអើពើនឹងរឿងនេះ។

ក្រុមហ៊ុនបច្ចេកវិទ្យា GeoResonance បានអះអាងថាខ្លួនបានរកឃើញទីតាំងបំណែកយន្តហោះពាណិជ្ជកម្មមួយក្នុងឆកសមុទ្របេងហ្គាល់ ឆ្ងាយពីកន្លែងដែលគេកំពុងស្វែងរកបច្ចុប្បន្នរាប់ពាន់គីឡូម៉ែត្រ

លោកបានប្រាប់ CNN នៅថ្ងៃអង្គារថា “យើងគឺជាក្រុមអ្នកវិទ្យាសាស្ត្រដ៏ធំមួយ ហើយយើងកំពុងត្រូវបានព្រងើយកន្តើយ ហើយយើងគិតថាយើងមានកាតព្វកិច្ចផ្នែកស្មារតីក្នុងការផ្តល់ជូននូវព័ត៌មានរបស់យើងដល់ពួកអាជ្ញាធរ”។

ក្រុមហ៊ុន GeoResonance ជាធម្មតាប្រើប្រាស់បច្ចេកវិទ្យាឆ្លុះមើលពីចម្ងាយដើម្បីស្វែងករប្រេង ឧស្ម័ន និងរ៉ែក្នុងដី។

ដំណឹងនេះលេចឡើងខណៈក្រុមស្វែងរករបស់អន្តរជាតិដែលប្រមូលផ្តុំគ្នានៅទីក្រុងភឺតបានជ្រាបពីព័ត៌មានថា ក្តីសង្ឃឹមក្នុងការស្វែងរកបំណែកអណ្តែតណាមួយបានរលាយបាត់អស់ទៅហើយ ដោយបំណែកយន្តហោះ MH370 ទំនងបានលិចទៅបាតមហាសមុទ្រឥណ្ឌាអស់ហើយ៕