Barcelona បង្ហាញ​ឱ្យ​ដឹង​ថា​ការ​ទិញ Neymar តាម​ពិត​ចំណាយ​អស់ 71.5 លាន​ផោន

Barcelona បង្ហាញឱ្យដឹងថាការទិញ Neymar តាមពិតចំណាយអស់ 71.5 លានផោន

ក្នុងកិច្ចព្រមព្រៀងចុះហត្ថលេខាទិញយកខ្សែប្រយុទ្ធ Neymar ពី Santos ក្លឹបយក្សអេស្ប៉ាញ Barcelona បានចំណាយអស់ 86.2 លានអឺរ៉ូ (71.5លានផោន) ដែលរាប់បញ្ចូលទាំងការចំណាយឱ្យខ្សែប្រយុទ្ធរូបនេះ និងគ្រួសាររបស់គេ។ យោងតាមការឱ្យដឹងរបស់ Barcelona កាលពីថ្ងៃសុក្រម្សិលមិញក្រោយពីឪពុកកីឡាកររូបនេះបានលុបចោលកិច្ចព្រមព្រៀងនៃសេចក្ដីទុកចិត្ត។

ការផ្លាស់មកពីក្លឹប Santos របស់កីឡាករលំដាប់អន្តរជាតិប្រេស៊ីលដែលក្លឹបអេស្ប៉ាញមួយនេះបាននិយាយថា ចំណាយអស់57.1លានអឺរ៉ូ(47.3លានផោន) នោះត្រូវបានស៊ើបអង្កេតដោយតុលាការពីបទរៀបចំហិរញ្ញវត្ថុមិនប្រក្រតីដែលអាចកើតមានក្រោយមានពាក្យបណ្ដឹងពីសមាជិកក្លឹបBarcaម្នាក់។

Sandro Rosell ដែលមានឈ្មោះនៅក្នុងពាក្យបណ្ដឹង តែបានបដិសេធថាខ្លួនមិនបានធ្វើអ្វីខុសនោះ បានលាលែងពីតំណែងកាលពីថ្ងៃព្រហស្បិ៍។ លោកបាននិយាយថា លោកចង់ការពារកិត្តិយសរបស់ក្លឹប ហើយបានចោទថាលោកនិងប្រពន្ធរបស់លោករងការគំរាមកំហែង។

Barca ស្ទាក់ស្ទើរក្នុងការបង្ហាញសេចក្ដីលំអិតនៃការទិញនេះ ដោយអាងលើកិច្ចសន្យានៃសេចក្ដីទុកចិត្ត ប៉ុន្តែក្រោយមានការប្រជុំគណកម្មការកាលពីថ្ងៃសុក្រ អ្នកទទួលតំណែងបន្តពីលោក Rosell គឺលោក Josep Bartomeu បាននិយាយនៅក្នុងសន្និសីទសារព័ត៌មានថា ឪពុករបស់ Neymar បានផ្ដល់ការអនុញ្ញាតឱ្យពួកគេនិយាយជាសាធារណៈ។

នាយកក្លឹប Barca លោក Raul Sanllehi បានធ្វើការផ្ទេរកីឡាកររូបនេះម្ដងទៀតដោយខ្លួនឯងដោយចំណាយ 57.1លានអឺរ៉ូ រាប់ទាំង17.1លានអឺរ៉ូឱ្យទៅក្លឹប Santos ហើយ40លានអឺរ៉ូ ជាប្រាក់សំណងឱ្យទៅក្រុមហ៊ុនដោយគ្រប់គ្រងដោយឪពុកម្ដាយរបស់ Neymar។

ទោះជាយ៉ាងណាលោកក៏បានបញ្ជាក់ពីការចំណាយផ្សេងទៀតក្នុងការផ្ទេរយកកីឡាកររូបនេះដូចជា ប្រាក់បន្ថែម១០លានអឺរ៉ូសម្រាប់ការចុះកិច្ចសន្យា ហើយនិងការចំណាយផ្សេងទៀតទៅលើគ្រួសារដែលទាំងអស់ត្រូវចំណាយដល់ 86.2លានអឺរ៉ូ។
Barca ផ្ដល់ប្រាក់បៀវត្សដល់ Neymar 8.8លានអឺរ៉ូក្នុងមួយរដូវកាលសម្រាប់កិច្ចសន្យា៥ឆ្នាំរបស់គេ។ នេះបើយោងតាមសម្ដីរបស់លោក Sanllehi៕

ដោយ nob70