ពលរដ្ឋ​អាមេរិក​នៅ​មិន​សុខ​ បើ​រដ្ឋាភិបាល​មិន​ព្រម​បណ្ដេញ​ Justin Bieber

ពលរដ្ឋអាមេរិកនៅមិនសុខ បើរដ្ឋាភិបាលមិនព្រមបណ្ដេញ Justin Bieber

កាលពីម្សិលមិញគេហទំព័រ nob70 បានចុះផ្សាយរួចមកហើយនូវព័ត៌មាននៃការចាប់ខ្លួនJustin Bieber និងការដាក់ពាក្យប្ដឹងឲ្យប្រធានាធិបតីអាមេរិកលោក Obama បណ្ដេញតារាចម្រៀងវ័យក្មេងដែលសម្បូររឿងអាស្រូវ Justin Bieber ចេញពីទឹកដីអាមេរិក។ ពាក្យបណ្ដឹងនោះ មានការចុះហត្ថលេខាពីពលរដ្ឋអាមេរិកច្រើនជាង ១០ ម៉ឺននាក់ដែលបង្ហាញថា ពួកគេនឹងនៅមិនសុខឡើយ បើសេតវិមានរបស់រដ្ឋាភិបាលមិនព្រមចេញមុខដោះស្រាយតាមពាក្យបណ្ដឹងនោះ។

ក្នុងពាក្យបណ្ដឹងដែលពលរដ្ឋទាំងនោះបានដាក់ជូនទៅសេតវិមានអាមេរិកបានសរសេរត្មេះដៀលJustin Bieber ដោយប្រើពាក្យមិនសមរម្យមួយចំនួនថា ” ពួកយើងចង់ឃើញមនុស្សគ្រោះថ្នាក់ មនុស្សចង្រៃ និងមនុស្សចោលម្សៀតដូចJustin Bieber នេះចេញពីទឹកដីអាមេរិក និងចង់ឲ្យរដ្ឋាភិបាលដកហូត Green Cardរបស់Justin Bieber មកវិញ ”។ ពាក្យពេចន៍ដ៏គ្រោតគ្រាតជាងនេះទៀតនោះគឺ ” Justin Bieberនេះមិនមែនត្រឹមតែជាមនុស្សដែលបង្កភាពគ្មានសណ្ដាប់ធ្នាប់ក្នុងសង្គមទេ តែថែមទាំងធ្វើឲ្យប៉ះពាល់អនាគតក្មេងៗជំនាន់ក្រោយទៀតផង”។

តាមការអះអាងរបស់សេតវិមានអាមេរិកថា ទាល់តែរកបានសម្លេងគាំទ្រច្រើនជាង ១០ម៉ឺនហត្ថលេខាទើបរដ្ឋាភិបាលអាចសម្រេចលើបណ្ដឹងនេះបាន ហើយពេលនេះចំនួននៃការចុះហត្ថលេខានោះច្រើនជាង ១០ម៉ឺនបែបនេះ បញ្ជាក់ថាលោក Obama មិនអាចគេចវេះមិនដោះស្រាយបានឡើយ។

រង់ចាំតាមដានទាំងអស់គ្នាថាតើវាសនារបស់Justin Bieber អាចត្រូវបានបណ្ដេញចេញពីទឹកដីអាមេរិក ឬអាចរស់នៅបានទៀត?

ដោយ nob70

ប្រភព៖ time