Nasa ប្រកាសគំរោង​ សិក្សា​ស្រាវ​ជ្រាវ​ថ្មី​ទៅ​លើ​ស្រទាប់​បរិយាកាស​ផែនដី

Nasa ប្រកាសគំរោង សិក្សាស្រាវជ្រាវថ្មីទៅលើស្រទាប់បរិយាកាសផែនដី

ស្រទាប់បរិយាកាសផែនដីពិតជាមានសារៈសំខាន់ណាស់ សម្រាប់ជីវិតមនុស្ស សត្វ រុក្ខជាតិ និងភាវៈមានជីវិតផ្សេងៗ ដែលមានជីវិតនៅលើផែនដី ដោយសារវាមាននាទីរក្សាកម្ដៅផែនដី និងរក្សាលំនឹងទឹកភ្លៀង -ល-។ ចំនែកក្រុមអ្នកវិទ្យាសាស្ត្រក៏បានសិក្សា និងស្រាវជ្រាវអំពីស្រទាប់បរិយាកាសរបស់ផែនដីរួចអស់ទៅហើយ តែនៅពេលថ្មីៗកន្លងទៅនេះ NASA ដែលជាភ្នាក់ងារ ស្ថានអាវកាស របស់សហរដ្ឋអាមេរិច បានធ្វើសេចក្ដីប្រកាសថ្មីមួយ ទៅលើការសិក្សា និងសង្កេតការទៅលើបរិយាកាសរបស់ផែនដីយើង អោយបានកាន់តែច្បាស់ជាងសព្វថ្ងៃ។

គំរោងថ្មីរបស់ NASA មានគោលដៅធំៗចំនួន 5 ដែលត្រូវប្រើប្រាស់ផ្កាយរណបវិទ្យាសាស្ត្រពិសេសៗ 3 និងមានឧបករណ៍បច្ចេកវិទ្យាជំនួយ 2 ផ្សេងទៀតនៅលើស្ថានីយ៍អាវកាសអន្តរជាតិ។ ផ្កាយរណបទាំង 3 និងឧបករណ៍វិទ្យាសាស្ត្រ 2 នោះតម្រូវអោយធ្វើការហោះជុំវិញភពផែនដីចាប់ពីខែកុម្ភះ ដល់ ខែវិច្ឆិកា ឆ្នាំ 2014 ហើយឧបករណ៍ទាំងនោះនឹងផ្ដល់ពត៌មានជាច្រើន ទៅដល់អ្នកវិទ្យាសាស្ត្រអំពីស្រទាប់បរិយាកាសផែនដី។

មិនត្រឹមតែប៉ុណ្ណោះផ្កាយរណបទាំង 3 និងឧបករណ៍ 2 នោះនឹងធ្វើការវាស់ស្ទង់កំរិត កាបូនឌីអុកស៊ីតក្នុងខ្យល់ កំរិតទឹកនៅក្នុងសណ្ឋានដី ចលនាភ្លៀងធ្លាក់ កម្លាំងខ្យល់សមុទ្រ និងស្រទាប់របស់ពពកផងដែរ។ នេះនឹងធ្វើអោយអ្នកវិទ្យាសាស្ត្រមានភាពងាយស្រួលក្នុងការកត់សំគាល់អាកាសធាតុ និងជាជំនួយជួយទៅដល់គំរោងវាស់ស្ទង់អាកាសធាតុផែនដីរបស់ NASA ផងដែរ។

ក្រុមអ្នកវិទ្យាសាស្ត្ររបស់ NASA បាននិយាយប្រាប់ផងដែរថា “គំរោងធំមួយនេះនឹងពង្រឹងប្រព័ន្ធសង្កេតការអាកាសធាតុអោយបានកាន់តែខ្លាំង និងមានតុល្យភាពច្បាស់លាស់ បើទោះបីជាគំរោងនេះធ្លាប់ទទួលរងសំពាធថវិការយ៉ាងណាក៏ដោយ តែពេលនេះគំរោងទាំង 5 របស់យើងជិតចាប់ផ្ដើមក្នុងឆ្នាំ 2014 នេះហើយ”។ ក្នុងនោះសារពត៌មាន CNN ក៏បានចេញផ្សាយទៀតថា “នាចុងទសវត្សរ៍នាឆ្នាំ 2020 ខាងមុខ NASA នឹងត្រៀមគំរោងធំចំនួន 6 ទៀត ដែលនឹងធ្វើការវាស់ស្ទង់កំរិតទឹកកក នៅលើផ្ទៃផែនដី និងកំរិតទឹកដែលមនុស្សប្រើប្រាស់ប្រចាំថ្ងៃចេញពីក្រោមដី”។

ខេមបូរីផត សូមបញ្ជាក់ប្រាប់ផងដែរថា ផ្កាយរណបទាំង 3 នោះមាន 1 នឹងត្រូវបង្ហោះចូលទៅលំហអាកាសនៅថ្ងៃទី 27 ខែកុម្ភៈ ចំនែក 1 ផ្សេងទៀតនៅខែ កក្កដា និងចុងក្រោយបំផុតនៅខែវិច្ឋិកា។ ដូច្នេះយើងសង្ឃឹមថា NASA នឹងទទួលបានជោគជ័យក្នុងគំរោងធំៗនេះ ពិសេសអាចជួយអភិវឌ្ឍន៍បច្ចេកវិទ្យាវាស់ស្ទង់អាកាសធាតុ បានកាន់តែច្បាស់លាស់ជាងមុន។

ប្រភពៈ Techno Buffalo