មហា​សោកនាដកម្ម​ក្រៅប្រទេស : ខ្មែរ​ស្លាប់​៧​នាក់ និង​របួស​១៤​នាក់ នៅក្នុង​ការបាក់​អគារ​នៅ​ថៃ​

មហាសោកនាដកម្មក្រៅប្រទេស : ខ្មែរស្លាប់៧នាក់ និងរបួស១៤នាក់ នៅក្នុងការបាក់អគារនៅថៃ

ភ្នំពេញ: អ្នកនាំពាក្យក្រសួងការបរទេសកម្ពុជា បាននិយាយថា ជនជាតិកម្ពុជា៧នាក់បានស្លាប់បាត់បង់ជីវិត និង១៤នាក់ទៀតបានរងរបួសនៅប្រទេសថៃ នៅពេលដែលមានការបាក់អគារនៃមន្ទីរពេទ្យមួយនៅក្នុងខេត្តសមុទ្រប្រាកាន។

លោកកុយ គួង អ្នកនាំពាក្យក្រសួងការបរទេស បាននិយាយថា
ពេលនេះស្ថានទូតកម្ពុជាប្រចាំប្រទេសថៃ កំពុងស្រាវជ្រាវអត្តសញ្ញាណជនរងគ្រោះទាំងនោះ ដែលជាកម្មករសំណង់ហើយទាក់ទងអាជ្ញាធរ និងក្រុមហ៊ុនថៃ ដើម្បីទាមទារសំណង់សម្រាប់ជនរងគ្រោះកម្ពុជាទាំងនោះ។

លោកកុយ គួង បានបញ្ជាក់ថា យើងមានការសោកស្តាយចំពោះហេតុការណ៍នោះ។ តែជាឧបទ្ទវហេតុ មិនមែនជាការប៉ុនប៉ងរៀបចំគម្រោងមនុស្សឃាតអ្វីទេ។

កាសែតថៃ បានរាយការណ៍កាលថ្ងៃអង្គារទី២៥កុម្ភៈថា ចំនួនមនុស្សស្លាប់ពីការបាក់អគារកំពុងសាងសង់ នៅស្រុកបាងភី នៃខេត្តសមុទ្រប្រកាន ជិតក្រុងបាងកក កាលពីថ្ងៃអង្គារបានឡើងដល់ ១០ នាក់ និង ១៦ នាក់ រងរបួស។

ចំណែកលោក កុយ គួង បានអះអាងថា កម្មករកម្ពុជាស្លាប់៧នាក់ និងរបួសចំនួនរហូតដល់១៤នាក់ នៅក្នុងហេតុការណ៍បាក់អគារនោះ។

ពិដានស៊ីម៉ង់ត៍ នៃសំណង់នេះបានបាក់នៅរង្វង់ប្រហែលថ្ងៃត្រង់ទី២៥ខែកុម្ភៈ។ អគារនេះជាផ្នែកនៃការពង្រីកមជ្ឈមណ្ឌលវេជ្ជសាស្ត្រចក្រី ណារឺ បូឌីនដ្រា នៃមន្ទីរពេទ្យ Ramathibodi Hospital។

ពួកមន្ត្រីជួយសង្គ្រោះ បាននិយាយថា ពិដានដែលធ្លាក់ជាប់នឹងអគារទី១ និងទី២ នៅជាន់ទី៤។ ពិដានប្រវែង ២០ គុណនឹង ១៥ ម៉ែត្រ និង កម្រាស់ ០,៣ ម៉ែត្រ បានធ្លាក់មកលើជាន់ទី២ ដោយសង្កត់លើកម្មករដែលកំពុងស្រស់ស្រូបអាហារ។

សាកសពពីរនៅតែស្ថិតក្រោមគំនរបាក់បែក ក្នុងពេលអ្នកជួយសង្គ្រោះកំពុងទម្លុះរបាដែក។

សំណង់អគារនេះនៅផ្នែកខាងជើងមានស្នាមប្រេះ និងរន្ទារកោង។ ពួកវិស្វករ បាននិយាយថា ពួកអ្នកជួយសង្គ្រោះប្រឈមគ្រោះថ្នាក់ ពីព្រោះអគារទាំងមូលអាចនឹងរលំ។

ដោយឡែកកម្មករខ្មែរដែលស្លាប់ ក្នុងឧបទ្ទហេតុនេះ មិនទាន់ត្រូវបានបញ្ជាក់ពីអត្តយសញ្ញាណនៅឡើយទេ។

ក្រុមហ៊ុនថៃ-អ៊ីតាលីមួយជាអ្នកម៉ៅការសង់ និងក្រុមហ៊ុន ACSE 110 Consortium ជាអ្នកត្រួតពិនិត្យគំរោង។ អាជ្ញាធរសន្យាធ្វើការ ស៊ើបអង្កេត ចំពោះគ្រោះថ្នាក់នេះ និងធានាសងដល់គ្រួសារ និងជនរងគ្រោះ៕R/L