តោះក្រឡេកទៅមើលឡានស៊េរីថ្មីៗ ដែលទើបតែមកដល់កម្ពុជាយើងបន្តិចមើល
ក្នុងរយៈពេលប៉ុន្មានឆ្នាំចុងក្រោយនេះ ទីផ្សាររថយន្តទំនើបៗនៅប្រទេសកម្ពុជាយើងកាន់តែមានភាពរីកដុះដាលគួរអោយកត់សម្គាល់ខ្លាំង។ ដោយឡែកសម្រាប់ឆ្នាំថ្មី 2014 នេះ យើងសង្កេតឃើញថានៅតាមឃ្លាំងលក់រថយន្តធំៗមួយចំនួនបាននាំចូលនូវរថយន្តស៊េរីថ្មីៗជាច្រើន មិនថារថយន្តរបស់ ជប៉ុន អាមេរិច អាឡឺម៉ង់ រឺអង់គ្លេសឡើយ។
ថ្ងៃនេះ Cambo Report សូមលើកយកនូវរថយន្តស៊េរីថ្មីៗមួយចំនួន ដែលទើបតែបាននាំចូលមកក្នុងព្រះរាជាណាចក្រកម្ពុជា ហើយពួកវាសុទ្ធសឹងតែជាកំពូលរថយន្តនាពេលបច្ចុប្បន្ននេះ។
CRV 2014
CRV គឺជារថយន្តដ៏ពេញនិយមបំផុតមួយ នៅក្នុងប្រទេសយើង ចាប់តាំងពីឆ្នាំ 2000 មកម្ល៉េះ ដោយសារតែកម្លាំងម៉ាស៊ីនវាល្អ ងាយស្រួលបើកបរ ហើយវាក៏មិនសូវស៊ីសាំងប៉ុន្មានដែរ។ នាពេលបច្ចុប្បន្ននេះ យើងសង្កេតឃើញ CRV ឆ្នាំ 1997 រឺក៏ 2000 នៅតែជាទីពេញនិយមនៅឡើយទេ ដូច្នេះប្រសិនបើអ្នកជ្រើសរើសយក CRV 2014 មួយនេះ អ្នកប្រហែលជាអាចជិះវាបានយូរអង្វែងជាងឡានដទៃ។ ម៉ាស៊ីនសាំងរបស់ CRV 2014 មានទំហំតូចត្រឹមតែ 2.4 លីត្រប៉ុណ្ណោះ និងប្រើប្រាស់សាំង 9,6 លីត្រ/100 គីឡូមែត្រក្នុងក្រុង និង 6,6លីត្រ/100 នៅផ្លូវលឿន។ សម្រាប់តម្លៃរបស់វាវិញ យើងមិនទាន់បានដឹងច្បាស់នៅឡើយទេ ប្រហែលពី 5 ទៅ 6 ម៉ឺនដុល្លាសហរដ្ឋអាមេរិច។
Toyota Tundra 2014
Tundra ចាប់ផ្តើមានការពេញនិយមនៅប្រទេសកម្ពុជាយើង ទើបតែរយៈពេលបួនឆ្នាំចុងក្រោយនេះទេ ដែលវាជាប្រភេទរថយន្ត Truck មានកម្លាំងខ្លាំងក្លា និងមានរូបរាងស្រស់ស្អាតផងដែរ។ រថយន្តមួយនេះមានលក្ខណៈស្រដៀងនឹងរថយន្ត Truck របស់ Ford ដែរ ប៉ុន្តែប្រជាជនខ្មែរយើងនិយមប្រើប្រាស់ Tundra ជាង ដោយសារវាស៊ីសាំងតិចនិងមានគុណភាពល្អ។ Tundra 2014 ត្រូវបានរចនាអោយស្អាតជាងមុនច្រើនទាំងផ្នែកខាងក្រៅ និងផ្នែកខាងក្នុង។ Tundra នៅតែប្រើប្រាស់ម៉ាស៊ីន V8 ដដែល ប៉ុន្តែមានសមត្ថភាពខ្លាំងជាងមុន និងស៊ីសាំងតិចជាងមុនបន្តិច។
Range Rover Sport 2014
Range Rover Sport 2014 គឺជារថយន្តដែលគេទន្ទឹមរង់ចាំច្រើនជាងបំផុត ព្រោះវាគឺជាកំពូលរថយន្តដែលងាយស្រួលបើកបរបំផុតនៅគ្រប់ស្ថានភាពផ្លូវ មិនថាផ្លូវបត់បែន ផ្លូវភក់ ឡើងភ្នំ ចុះទឹករឺយ៉ាងណានោះទេ។ រថយន្តមួយនេះមានច្រើនជម្រើស ដែលមានដូចជា Supercharge ប្រើប្រាស់សាំងច្រើន តែម៉ាស៊ីនខ្លាំង និងរថយន្តប្រើប្រាស់ម៉ាស៊ូតជាដើម។ ក្រឡេកទៅមើលការរចនារបស់វាវិញ គឺជាការច្របាច់បញ្ចូលគ្នារវាង Range Rover Evoque និង Range Rover Biography ដូច្នេះយើងអាចនិយាយបានថា វាគឺជាសមិទ្ធផលពិសេសចុងក្រោយបង្អស់ពី Range Rover។ តម្លៃរបស់វាដូចជារាងថ្លៃបន្តិច ចន្លោះពី 145,000$ ទៅ 155,000$ សហរដ្ឋអាមេរិច ហើយវាកំពុងដាក់លក់នៅតាមឃ្លាំងរថយន្តល្បីៗមួយចំនួន ដូចជា ហាក់ស្រ៊ុន ជាដើម។
រក្សាសិទ្ធិដោយ : cambo-report.comផ្សាយក្នុងក្រុម បច្ចេកវិទ្យា
សំគាល់
Khmer Feed យើងខ្ញុំសូមមិនទទួលខុសត្រូវចំពោះពត័មានណាដែលមិនមែនជារបស់យើងខ្ញុំទេ។
រាល់ព័តមានពិតឫមិនពិតសូមទំនាក់ទំនងទៅកាន់ប្រភពដើមដែលយើងដាក់តំនរភ្ជាប់ទៅអោយ។សូមអរគុណចំពោះការគាំទ្រ។
សូមជួយផ្តល់មតិ
Share This Post
អត្ថបទផ្សេងៗ៖
0 comments: