សិស្ស​វិទ្យាល័យ​កំពង់​លែង​ម្នាក់​ត្រូវ​សិស្ស​វិទ្យាល័យ​មួយ​ទៀត​ព្រួត​កាប់​ជិត​ដាច់​ច្រមុះ

សិស្សវិទ្យាល័យកំពង់លែងម្នាក់ត្រូវសិស្សវិទ្យាល័យមួយទៀតព្រួតកាប់ជិតដាច់ច្រមុះ

កំពង់ឆ្នាំង ៖ យុវសិស្សម្នាក់ត្រូវបានសិស្សមួយក្រុមផ្សេងទៀតព្រួតគ្នាឈ្លោះ និងលួចកាប់ប៊ិះដាច់ច្រមុះ បន្ទាប់ពីពួកគេបានប្រកួតកីឡាបាល់ទាត់កាលពីព្រឹករួចមក។ ករណីនេះបានកើតឡើងវេលាម៉ោង៩យប់ថ្ងៃទី២៤ ខែកុម្ភៈ នៅក្នុងសាលាបឋមសិក្សាគំរូក្រុងកំពង់ឆ្នាំង ស្ថិតនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។

សិស្សរងគ្រោះបាននិយាយឲ្យដឹងថា រូបគេឈ្មោះ ភ័ន្ត ណារ៉ង អាយុ១៩ឆ្នាំ រៀននៅវិទ្យាល័យហ៊ុន សែនកំពង់លែង រស់នៅភូមិកំពង់បឹង ឃុំកំពង់ហៅ ស្រុកកំពង់លែង។ នៅព្រឹកថ្ងៃទី២៤ ខែកុម្ភៈ រូបគេនៅក្នុងក្រុមកីឡាយុវជនវិទ្យាល័យកំពង់លែង បានប្រកួតកីឡាបាល់ទាត់ជាមួយ ក្រុមកីឡាយុវជនវិទ្យាល័យក្រុងកំពង់ឆ្នាំង ដែលលទ្ធផលប្រកួតក្រុមកីឡាក្រុងកំពង់ឆ្នាំងឈ្នះក្រុមកីឡាកំពង់លែង១០ទល់នឹង០។

នៅពេលយប់មុនពេលកើតហេតុរូបគេបានអង្គុយជជែកគ្នាលេងជាមួយមិត្តភក្ដិ៥នាក់ក្នុងសាលាបឋមសិក្សាគំរូក្រុងដែលជាកន្លែងសម្រាក។ នៅម៉ោង៩យប់មានសិស្សមួយក្រុមផ្សេងទៀត មិនដឹងជានៅវិទ្យាល័យណាទេមានគ្នាប្រមាណ២០នាក់បានមកមកព័ទ្ធពួកខ្លួន ហើយគ្នាគេប្រមាណ១០នាក់បានមកវាយពួកខ្លួន ក្នុងពេលនោះដែរមានគេលួចកាប់ចំច្រមុះខ្លួនប៊ិះដាច់ ហើយក្រុមសិស្សបង្កក៏បានរត់គេចខ្លួនអស់។

ក្រោយពេលកើតហេតុ ជនរងគ្រោះត្រូវបានមិត្តភក្ដិដឹកមកមន្ទីរពេទ្យបង្អែកខេត្ត ដើម្បីឲ្យគ្រូពេទ្យសង្គ្រោះព្យាបាល និងបានដេរច្រមុះភ្ជាប់ឡើងវិញជិត១០ថ្នេរ។ ជនរងគ្រោះឲ្យដឹងទៀតថារូបគេមិនចំណាំមុខជនដៃដល់ និងបក្ខពួកគេជាសិស្សវិទ្យាល័យណាមួយច្បាស់នោះទេ សំណូមពរឲ្យសមត្ថកិច្ចជួយស្រាវជ្រាវផង។

សមត្ថកិច្ចនគរបាលព្រហ្មទណ្ឌក្រុងកំពង់ឆ្នាំងបានឲ្យដឹងថា ក្រោយពេលកើតហេតុ ក្រុមសិស្សបង្កបានរត់គេចខ្លួនអស់ទៅហើយ តាមការអះអាងរបស់មិត្តភក្ដិសិស្សរងគ្រោះថា ក្រុមសិស្សបង្កជាសិស្សវិទ្យាល័យមួយកាលពីថ្ងៃគេបានពាក់អាវកីឡាលេខ….សមត្ថកិច្ចសុំលាក់សិនព្រោះកំពុងស្ថិតក្នុងការសង្ស័យនៅឡើយ។ ករណីនេះសមត្ថកិច្ចកំពុងធ្វើការស្រាវជ្រាវយ៉ាងយកចិត្តទុកដាក់ដើម្បីវែកមុខជនដៃដល់ និងចាប់ខ្លួនឲ្យមកទទួលខុសត្រូវចំពោះមុខច្បាប់។

គេសង្កេតឃើញថា ការប្រកួតកីឡាសិស្សថ្នាក់ខេត្តជារៀងរាល់ឆ្នាំ តែងមានទំនាស់កើតឡើងមិនសូវខានទេ ហើយឆ្នាំនេះបានក្លាយជាការបង្ករបួសស្នាមទៀតផង ដែលលោកគ្រូ អ្នកគ្រូតាមសាលានីមួយៗត្រូវប្រុងប្រយ័ត្ន ការពារសិស្សរបស់ខ្លួនដែលជាកីឡាករឲ្យបានម៉ឺងម៉ាត់ ពេលមានបញ្ហាត្រូវរាយការណ៍ជូនសមត្ថកិច្ចជាបន្ទាន់ដើម្បីសហការគ្នាទប់ស្កាត់ឲ្យបានទាន់ពេលវេលា៕

ស្ត្រីម្នាក់ត្រូវបានគេសង្គ្រោះចេញពីស៊ីម៉ង់ត៍ទម្ងន់រាប់តោនបានសម្រេច

ថារិទ្ធ