ថ្ងៃ​នេះ យ៉ីងឡាក់ ចូល​ស្ដាប់​ការ​ចោទប្រកាន់​​របស់​ NACC ដែរ​ឬ​ទេ?

ថ្ងៃនេះ យ៉ីងឡាក់ ចូលស្ដាប់ការចោទប្រកាន់របស់ NACC ដែរឬទេ?

កាលពីពេលថ្មីៗនេះ គណៈកម្មការប្រឆាំងអំពើពុករលួយថៃ NACC បានកោះហៅឱ្យលោកស្រីនាយករដ្ឋមន្ត្រី យ៉ីងឡាក់ ចូលស្ដាប់ការចោទប្រកាន់អំពីបញ្ហាអំពើពុករលួយលើកម្មវិធីទំនុកបម្រុងស្រូវអង្កររបស់រដ្ឋាភិបាល ហើយថ្ងៃព្រហស្បតិ៍នេះ ជាថ្ងៃដែលត្រូវចូលខ្លួន។ តើលោកស្រីនឹងចូលខ្លួន មកស្ដាប់ការចោទប្រកាន់ដែរឬទេ?

BBC បានចុះផ្សាយថា កាលពីម្សិលមិញលោកស្រីនាយករដ្ឋមន្ត្រីដែលត្រូវជាប្អូនលោក ថាក់ស៊ីន បានធ្វើដំណើរទៅភាគខាងជើងទីក្រុង Chiang Rai នឹងមិនចូលស្ដាប់ដោយផ្ទាល់នៅស្នាក់ការ NACC ទេ គឺឱ្យមេធាវីរបស់លោកស្រីជាអ្នកចូលស្ដាប់ការចោទជំនួសវិញ។

ប្រភពថាបើសិនរកឃើញថា ពិតជាមានអំពើពុករលួយមែននោះ លោកស្រី យ៉ីងឡាក់ អាចនឹងត្រូវដកចេញពីតំណែង និងអាចប្រឈមមុខការហាមមិនឱ្យធ្វើនយោបាយរយៈពេល៥ឆ្នាំ។

ទោះបីជាយ៉ាងណា រដ្ឋាភិបាលចាំផ្ទះដែលបដិសេធន៍ការចោទនេះបាននិយាយថា លោកស្រីមានឆន្ទៈសហករណ៍ជាមួយ NACC ដើម្បីរកការពិត។

ក្រុមបាតុករអាវក្រហមគាំទ្រលោកស្រី យ៉ីងឡាក់ កាលពីថ្ងៃពុធម្សិលមិញ បានប្រមូលគ្នាតវ៉ានៅបរិវេណគណៈកម្មការប្រឆាំងអំពើពុករលួយ NACC ដើម្បីកុំឱ្យបុគ្គលិកស្ថាប័ននេះចូលធ្វើការ។

កម្មវិធីទំនុកបម្រុងស្រូវអង្កររបស់រដ្ឋាភិបាល បានខាតបង់ប្រមាណ ៤.៤ពាន់លានដុល្លារអាមេរិក ដែលបានធ្វើឱ្យកសិករជាច្រើនអត់លុយ និងជំពាក់បំណុលគេច្រើនខែ។

ភាពតានតឹងក្នុងប្រទេសថៃបានកើតឡើងអស់ជាច្រើនសប្ដាហ៍ ជាមួយនឹងការបាញ់សម្លាប់ ការវាយប្រហារដោយគ្រាប់បែកដៃនៅកន្លែងប្រឆាំងរដ្ឋាភិបាល។

កុមារ ៤នាក់បានស្លាប់ក្នុងចំណោមអ្នកស្លាប់នៃការបំបែកហ្វូងបាតុករក្នុងទីក្រុងបាងកក កាលពីសប្ដាហ៍មុន។ មកដល់ពេលនេះ យ៉ាងហោចណាស់ មានមុសន្ស២០នាក់បានស្លាប់ ចាប់តាំងពីមានការតវ៉ាតាមផ្លូវទ្រង់ទ្រាយធំនៅថ្ងៃទី២៤វិច្ឆិការឆ្នាំ២០១៣៕

ដោយ nob70
ប្រភព៖ BBC