BlackBerry​ គ្រោង​នឹង​បញ្ចេញ​ កំពូល​ស្មាត​ហ្វូន​ ដែល​មាន​ក្តារ​ចុច​ពិសេស​បី​ម៉ូឌែល​ទៀត

BlackBerry គ្រោងនឹងបញ្ចេញ កំពូលស្មាតហ្វូន ដែលមានក្តារចុចពិសេសបីម៉ូឌែលទៀត

BlackBerry ធ្លាប់ជាក្រុមហ៊ុនទូរស័ព្ទដ៏ល្បីល្បាញមួយ ដែលនរណាៗក៏ចង់ប្រើប្រាស់ដែរ ប៉ុន្តែសព្វថ្ងៃនេះ ទីផ្សាររបស់ខ្លួនបានបាត់បង់ទាំងស្រុងហើយ ទៅលើ Apple, និង Samsung។ ក្នុងរយៈពេលប៉ុន្មានខែចុងក្រោយនេះ BlackBerry ត្រូវបានចែចង់ទិញភាគហ៊ុនទាំងមូលពីក្រុមហ៊ុនជាច្រើន ហើយក្នុងនោះក៏មាន Facebook ដែរ ប៉ុន្តែ BlackBerry នៅតែឈររឹងមាំ ហើយសំងំផលិតទូរស័ព្ទបន្តទៅទៀត។

នៅក្នុងពេលថ្មីៗនេះ លោកនាយកប្រតិបត្តិក្រុមហ៊ុន BlackBerryលោក John Chen បានបញ្ជាក់ថា កំពូលស្មាតហ្វូនចំនួនបីម៉ូឌែលទៀតរបស់ BlackBerry នឹងមកដល់ទីផ្សារក្នុងពេលឆាប់ៗនេះហើយ។ ពួកវាមិនមែនជាទូរស័ព្ទដែលមានសណ្ឋានដូចទៅនឹង iPhone រឺក៏ទូរស័ព្ទ Android បច្ចុប្បន្ននោះទេ ប៉ុន្តែវាគឺជាស្មាតហ្វូនដែលមានប៊ូតុងច្រើន QWERTY ដូចទៅនឹងទូរស័ព្ទម៉ូឌែលចាស់ៗរបស់ខ្លួនដែរ។ BlackBerry Q20 អាចជាស្មាតហ្វូនមួយក្នុងចំណោមនោះ ដែលវាមានអេក្រង់ទំហំធំ ដល់ទៅ 3.5 អ៊ីញឯណោះ និងមានប៊ូតុង Qwerty ជាច្រើនសម្រាប់ចុចផងដែរ។

ចំណែកឯស្មាតហ្វូនរបស់ BlackBerry មួយទៀតនោះអាចនឹងមានឈ្មោះថា Windermere ដែលវាមានរូបរាងស្រស់ស្អាត និងខុសប្លែកពីស្មាតហ្វូនដទៃមុនៗរបស់ BlackBerry។ រូបរាងរបស់វានឹងមិនមានសណ្ឋានរាងជ្រុងដូចទៅនឹង ទូរស័ព្ទ BlackBerry បច្ចុប្បន្ននោះទេ ពោលវានឹងមានបណ្តោយវែងជាងមុនភ្ជាប់ជាមួយប៊ូតុងពិសេស អាចបញ្ជាបានដោយប៉ះលើវាតែប៉ុណ្ណោះ។ វាគ្រាន់តែជាការសន្និដ្ឋានរបស់យើងតែប៉ុណ្ណោះ ព្រោះអី BlackBerry មិនដែលបោះបង់រូបរាងដើមរបស់ស្មាតហ្វូនខ្លួនដែលមានប៊ូតុងចុចច្រើនឡើយ។

ស្មាតហ្វូនទាំងនេះ នឹងមិនមានវត្តមាននៅក្នុងឆ្នាំ 2014 នេះឡើយ ពោលត្រូវរង់ចាំដល់ឆ្នាំ 2015 និង 2016 ឯណោះ។ នៅក្នុងដំណាក់កាលនេះ BlackBerry នឹងមិនប្រញប់ប្រញាល់បង្កើតទូរស័ព្ទ ហើយលក់នៅក្នុងទីផ្សារឡើយ ពោលខ្លួននឹងធ្វើដោយសន្សឹមៗ មិនយឺត ហើយក៏មិនលឿនដែរ។

តើអ្នកទាំងអស់គ្នាមានចំណាប់អារម្មណ៍យ៉ាងណាដែរចំពោះគំរោងស្មាតហ្វូនថ្មីៗរបស់ BlackBerryនេះ? គម្រោងទាំងនេះហាក់បីដូចជាមិនតម្រូវតាម ទីផ្សារបច្ចុប្បន្នសោះឡើយ ហើយយើងក៏មិនដឹងពីយុទ្ធសាស្ត្រថ្មីរបស់ BlackBerryដែរ។ សង្ឃឹមថាខ្លួនអាចងើបឡើងវិញទៅចុះ ព្រោះខ្លួនមានស្នាដៃច្រើនណាស់កាលពីមុន ដូចទៅនឹងក្រុមហ៊ុន Nokia ដែរ។