គម្រោង​អាគារ​ខ្ពស់​ជាង​គេ​លើ​ពិភព​លោក​នឹង​ចាប់​ផ្ដើម​នៅ​ខែ​មេសា​នេះ​ហើយ!

គម្រោងអាគារខ្ពស់ជាងគេលើពិភពលោកនឹងចាប់ផ្ដើមនៅខែមេសានេះហើយ!

តើអ្នកដឹងទេថាសព្វថ្ងៃនេះ អគារអ្វីដែលមានកម្ពស់ខ្ពស់ជាងគេនោះ? ជាការពិតណាស់ បើនិយាយពីអាគារខ្ពស់ ប្រិយមិត្តខ្លះប្រហែលជាធ្លាប់ឮអាគារឈ្មោះ Burj Khalifa របស់ប្រទេសអារ៉ាប់ហើយ ដែលវាមានកម្ពស់ដល់ទៅ 828 ម៉ែតខ្ពស់ជាងគេលើពិភពលោក ប៉ុន្ដែមិនយូរទេអគារដ៏ខ្ពស់ស្កឹមស្កៃមួយនេះ នឹងលែងឈរនៅលំដាប់លេខមួយទៀតហើយ ព្រោះអគារ Sky City របស់ប្រទេសចិនដែលមានកម្ពស់ 838 ម៉ែតនឹងសាងសង់រួចរាល់នៅរយៈពេលប៉ុន្មានខែខាងមុខ ក្នុងឆ្នាំ 2014 នេះតែម្ដង ដើម្បីមកទម្លាក់តំណែងរបស់អគារ Burj Khalifa។

យ៉ាងណាមិញ ខណៈពេលដែលសំណង់ Sky City ជិតរួចរាល់ជាស្ថាពរនោះ ស្ថាបត្យកររបស់ប្រទេសអារ៉ាប់ក៏មិននៅស្ងៀមដែរ ដោយគម្រោងអគារខ្ពស់កប់ពពកមួយទៀតរបស់ប្រទេសនេះ នឹងចាប់ផ្ដើមសាងសង់នៅថ្ងៃទី 27 ខែមេសា នេះហើយ។ Kingdom Tower មានទីតាំងស្ថិតនៅទីក្រុង Jeddah ភាគខាងលិចប្រទេសអារ៉ាប់ បានរចនាមកដោយវិស្វករ Adrian Smith ជាអ្នកដែលធ្លាប់រចនាប្លង់អោយអគារ Burj Khalifa ដែរ ម្យ៉ាងទៀតអាគារ Kingdom Tower នេះមានកម្ពស់ 1007 ម៉ែត នឹងត្រូវប្រើពេល 63 ខែដើម្បីសាងសង់ ដោយត្រូវចំនាយទឹកប្រាក់អស់ប្រមាណជា 1.23 ពាន់លានដុល្លាឯណោះ។ បើតាមការប៉ាន់ស្មាន អាគារនេះនឹងសង់រួចរាល់នៅឆ្នាំ 2019 ដូចនេះ អាគារ Sky City របស់ប្រទេសចិនដែលនឹងរួចរាល់ក្នុងឆ្នាំ 2014 នេះ នឹងអាចឈរឈ្មោះជាអាគារខ្ពស់ជាងគេបំផុតលើពិភពលោកបានរយៈពេល 5 ឆ្នាំដែរ ទម្រាំតែមានវត្តមានផ្លូវការរបស់ Kingdom Tower។

នេះគឺជារឿងដ៏អស្ចារ្យមួយដែល មនុស្សយើងអាចសាងសង់អាគារមួយដែលមានកំពស់ដល់ទៅ 1 គីឡូម៉ែតបែបនេះ អ្នកសាកស្រម៉ៃមើលថាអាគារ Kingdom Tower នេះនឹងខ្ពស់ប៉ុណ្ណាទៅ ហើយបើយើងឡើងតាមជណ្ដើរជើងទៅកំពូលអគារ តើយើងនឹងត្រូវចំនាយពេលប៉ុន្មាន? ដូចនេះ រង់ចាំមើលទាំងអស់គ្នាថាតើ Kingdom Tower នេះនឹងអាចសាងសង់បានជោគជ័យដែរឬទេ?

ខាងក្រោមនេះជារូបភាពគំរូបន្ថែមរបស់អគារ Kingdom Tower