ចិន​នៅ​តែ​បន្ត​កិច្ច​សហ​ប្រតិបត្តិការ​​​ជាមួយ​អូស្ត្រាលី​ដើម្បី​ស្វែងរក​យន្តហោះ​បាត់​ខ្លួន

ចិននៅតែបន្តកិច្ចសហប្រតិបត្តិការជាមួយអូស្ត្រាលីដើម្បីស្វែងរកយន្តហោះបាត់ខ្លួន

អ្នកនាំពាក្យក្រសួងការបរទេសចិន បានឲ្យដឹងកាលពីថ្ងៃសុក្រថា រដ្ឋាភិបាលក្រុងប៉េកាំង នៅតែបន្តកិច្ចសហប្រតិបត្តិការជាមួយប្រទេសអូស្ត្រាលី ដើម្បីរុករកយន្តហោះបាត់ខ្លួន MH370របស់ក្រុមហ៊ុន អាកាសចរណ៍ម៉ាឡេស៊ី។

លោកហុង ឡី បានថ្លែងនៅក្នុងសន្និសីទកាសែតប្រចាំថ្ងៃនាទីក្រុងប៉េកាំងថា មន្ទីរជួយសង្គ្រោះ និងរុករកនាវាចរណ៍ចិន នៅតែបន្តកិច្ចសហប្រតិបត្តិការស្វែងរកយន្តហោះបាត់ខ្លួន ក្រោយទទួលបាន ព័ត៌មាន លំអិតពីភាគីអូស្ត្រាលីថា ទីតាំងដែលសង្ស័យ អាចនឹងរកឃើញយន្តហោះដែលបាត់នោះ។

លោកហុង ឡី បានឲ្យដឹងទៀតថា នាវាចិនជាច្រើនគ្រឿង ក្នុងនោះរួមមានទាំងនាវាស៊ើបការណ៍ Nanhaijiu 101 កំពុងរុករកនៅតំបន់ភាគខាងកើតមហាសមុទ្រឥណ្ឌា ហើយប្រទេសលោក នឹងបន្ត សហការជាមួយប្រទេសអូស្ត្រាលី ក្នុងប្រតិបត្តិការស្វែងរកយន្តហោះដែលបាត់ខ្លួន។

គួរឲ្យដឹងថា យន្តហោះដឹកជញ្ជូន IL 76របស់កងកម្លាំងទ័ពអាកាសចិន បានចូលរួមបេសកកម្មស្វែងរក យន្តហោះបាត់ខ្លួនរបស់ក្រុមហ៊ុនអាកាសចរណ៍ម៉ាឡេស៊ីនេះផងដែរ៕

សារ៉ាត់

ប្រភព៖ កម្ពុជាថ្មី