គ្រោះថ្នាក់ដ៏រន្ធត់! រថភ្លើងមួយគ្រឿង បើកហួសចំណត បុកឡើងលើ ជណ្តើរយន្ត ខណៈអ្នកបើក ងងុយដេក (មានវីដេអូ)

គ្រោះថ្នាក់រថភ្លើងដ៏រន្ធត់មួយ នៅឯព្រលានយន្តហោះ Chicago O'Hare International Airport ស្ថិតក្នុងទីក្រុង Chicago នៃរដ្ឋ Illinois សហរដ្ឋអាមេរិក ត្រូវបានថតជាប់ ដោយកាមេរ៉ាសុវត្ថិភាពនៅទីនោះ ដែលបង្ហាញឲ្យឃើញថា រថភ្លើងមួយគ្រឿង បានបើកហួសចំណត រួចក៏បើកបុកឡើង លើជណ្តើរយន្ត ខណៈអ្នកបើកងងុយដេក។

ហេតុការណ៏រថភ្លើងបុកឡើងលើជណ្តើរយន្ត នៅឯព្រលានយន្តហោះ Chicago O'Hare International Airport នេះ បានកើតឡើង និងបង្កឲ្យមានការភ្ញាក់ផ្អើល កាលពីវេលាម៉ោង២ និង៥០នាទីព្រឹក ថ្ងៃទី២៤ ខែមិនា កន្លងទៅនេះ និងបណ្តាលឲ្យមនុស្សចំនួន ៣២នាក់ រងរបួសផងដែរ។

បើយោងតាមប្រភពព័ត៌មាន បានឲ្យដឹងថា នៅពេលកើតហេតុ អ្នកបើករថភ្លើងនោះ អស់កំលាំង និងងងុយដេកខ្លាំង ជាហេតុបណ្តាលឲ្យរថភ្លើង បើកហួសចំណត និងបុកឡើងទៅលើជណ្តើរយន្ត ដែលស្ថិតនៅចំពីមុខ ខ្សែរថភ្លើងនោះតែម្តង។

ទោះបីជាយ៉ាងណាក៏ដោយ នៅពេលកើតហេតុ មានតែអ្នកនៅលើរថភ្លើងតែប៉ុណ្ណោះ ដែលបានរងរបួស ព្រោះនៅពេលនោះ មិនសូវមានមនុស្ស នៅទីនោះឡើយ ដោយសារតែព្រឹកព្រលឹមពេក៕