លេច​ចេញ​រូប​រាង​របស់​ Galaxy​ Tab​ 4​ ហើយ​តើ!

លេចចេញរូបរាងរបស់ Galaxy Tab 4 ហើយតើ!

Galaxy Tab គឺជាថេប្លេតដំបូងគេបង្អស់របស់ក្រុមហ៊ុន Samsung ដែលចាប់កំណើតឡើងនៅក្នុងឆ្នាំ 2010 ជាគូប្រជែងជាមួយនឹង iPad ជំនាន់ដំបូង។ ប៉ុន្តែត្រកូល Galaxy Tab បានអស់ប្រជាប្រិយភាពទៅវីញ ដោយសារ Samsung យកចិត្តទុកដាក់ខ្ពស់ក្នុងការផលិត Galaxy Note ជាង។ ដូច្នេះសព្វថ្ងៃនេះ ត្រកូល Galaxy Tab គឺសុទ្ធសឹងតែមានតម្លៃថោកសមរម្យ ដោយសារវាមានលក្ខណៈសម្បត្តិល្មម គួរសមប្រើប្រាស់។

ដោយឡែក ខាងលើនេះគឺជារូបភាពបែកធ្លាយរបស់ Galaxy Tab 4 ដែលយើងសង្កេតឃើញថា វាមានរូបរាងស្រស់ស្អាតជាងមុនឆ្ងាយ ដោយមានគែមកាន់តែខ្លី ស្រដៀងនឹង Galaxy Note 3 ដែរ។ រូបភាពបែកធ្លាយនេះ ត្រូវបានបង្ហោះដោយគណនី Twitter @evleaks ដែលជាកំពូលអ្នកចែករំលែករូបភាពឧបករណ៍ថ្មីៗក្នុងអ៊ីនធឺណែត។ Galaxy Tab 4 មួយនេះមានអេក្រង់ 7អ៊ីញ ដូចទៅនឹងស៊េរីមុនៗដែរ ហើយនៅតែប្រើប្រាស់ស៊ីមដដែល សម្រាប់ ប្រើប្រាស់អ៊ីនធឺណែត ផ្ញើរសារ និងខលចេញ-ចូល។ គួរអោយសោកស្តាយដែរ ដែលយើងមិនបានឃើញសន្ទះខាងក្រោយរបស់វា ហើយសង្ឃឹមថាវានឹងមានសន្ទះខាងក្រោយ ដូចស្បែកកាបូប មានគម្រូតាម Galaxy Note 3 ដែរទៅចុះ។

បើយោងទៅតាមប្រភពចចាមអារ៉ាមបានអោយដឹងថា Galaxy Tab 4 អេក្រង់ 7 អ៊ីញមួយនេះ មានលក្ខណៈសម្បត្តិមធ្យមទេ ដោយមានកម្រិតភាពច្បាស់ប្រភេទ WXGA (1280x720) ស៊ីភីយូ Quad-core ល្បឿន 1.2Ghz, រ៉េម 1GB, មេម៉ូរីម៉ាស៊ីនទំហំ 8GB, កាមេរ៉ាក្រោយទំហំ 3មេហ្គាភិចសែល និងមុខទំហំ 1.2 មេហ្គាភីចសែល។ វានឹងដំណើរការដោយ Android Kitkat 4.4.2 ប៉ុន្តែ User interface វិញ យើងមិនទាន់ដឹងច្បាស់នៅឡើយទេ។

ទន្ទឹមនឹងនេះដែរ វិមាត្រវាគឺកាន់តែតូច និងស្តើងជាងមុនទៀតគឺ 106x187x8.9 មីលីម៉ែត្រប៉ុណ្ណោះ ងាយស្រួលក្នុងការកាន់ និងប្រើប្រាស់ជាងមុនឆ្ងាយ។ ចំណែកឯកម្លាំងថ្មរបស់វាវិញ ក៏មានទំហំខ្លាំងជាងមុនផងដែរ រហូតដល់ 4,450 mAh ធំល្មម អាចប្រើប្រាស់បានជាង 7ទៅ 8ម៉ោង។ គេរំពឹងទុកថា Samsung នឹងប្រកាសវាជាផ្លូវការនៅខែក្រោយនេះ គឺថ្ងៃទី 24 ខែមេសា ជាមួយនឹងតម្លៃមួយដែលមិនទាន់ដឹងច្បាស់។