Hyundai ប្រកាស​បង្កើត​រោងចក្របន្ថែម ខណៈ Nissan កំពុង​ជួប​ទុក្ខ

Hyundai ប្រកាសបង្កើតរោងចក្របន្ថែម ខណៈ Nissan កំពុងជួបទុក្ខ

ក្រុមហ៊ុន Hyundai បានប្រាកាសគម្រោងសាងសង់រោងចក្រចំនួន ៤ក្នុងប្រទេសចិន ខណៈ Nissan បានប្រកូកប្រកាសហៅរថយន្តជាង ១លានគ្រឿងទូទាំងពិភពលោក មកជួសជុលពោងសុវត្ថិភាព។

hyundai_new_factory_china_2014.4gvh6liobhmo4okk4skoggs8k.a5fuq7lrqzkgc0ccw4ss08gso.th

លោក Chung Mong-koo ប្រធានក្រុមហ៊ុនកូរ៉េខាងត្បូង Hyundai Motor group អាចនឹងចុះហត្ថលេខាយល់ព្រមជាលើកដំបូងជាមួយរដ្ឋាភិបាលចិនថ្ងៃនេះ ស្ដីពីការសាងសង់រោងចក្រផលិតរថយន្តក្នុងទីក្រុង Chongqing ។

ផ្អែកតាមប្រភពមិនបញ្ចេញឈ្មោះមួយបានឱ្យដឹងថា ការវិនិយោគរបស់ Hyundai អាចចំណាយកញ្ចប់ទឹកប្រាក់ ៩០០លានដុល្លារអាមេរិក។ ប្រភពដដែលបន្តថា រោងចក្រនឹងអាចផលិតរថយន្តបាន ៣០០ ០០០គ្រឿងជាប្រចាំឆ្នាំ។

Hyundai ប្រឈមនឹងការប្រកួតប្រជែងយ៉ាងខ្លាំងក្នុងទីផ្សារចិន ដែលក្រុមហ៊ុននីមួយៗតួយ៉ាង Toyota , MG, Wolksagen បានកំពុងបង្កើនការផលិតនិងលក់យ៉ាងផុលផុស។

ក្នុងឆ្នាំ ២០១៣ ក្រុមហ៊ុនធំកូរ៉េខាងត្បូងមួយនេះ លក់រថយន្តបានជាង១លានគ្រឿងជាលើកដំបូងក្នុងប្រទេសចិន លក់បាន ៧២០ ៧៨៣គ្រឿងនៅអាមេរិក និងលក់បាន ៦៤០ ៦៩៨គ្រឿងនៅកូរ៉េខាងត្បូង។

យ៉ាងណាមិញ បន្ទាប់ពីដំណឹងថា Hyundai កំពុងពង្រីកវិស័យរថយន្តនៅចិន បែរជា Nissan កំពុងជួបបញ្ហា ទៅវិញ។ កាលពីថ្ងៃពុធ ក្រុមហ៊ុនជប៉ុនមួយនេះ បានប្រកាសប្រមូលរថយន្តជាង ១ ០៥៣ ៤៧៩គ្រឿងលើពិភពលោក មកជួសជុលពោងសុវត្ថិភាពអ្នកដំណើរផ្នែកខាងមុខ តាមបណ្ដាក្រុមហ៊ុនចែកចាយ។ ក្នុងនោះមាន ៩៨៩ ៧០១គ្រឿងនៅអាមេរិក ៦០ ០០០ គ្រឿងនៅកាណាដា ហើយចំនួនសេសសល់គឺគិតតាមបណ្ដាប្រទេសនានាលើពិភពលោក។

2013-Nissan-Altima-front-three-quarter-2

រថយន្ត Nissan Altima ឆ្នាំ ២០១៤

រថយន្តដែលក្រុមហ៊ុនធំលំដាប់ទី២នៅជប៉ុនហៅមកជួសជុលមាន Altima, Leaf electric car, Pathfinder SUV, NV200 Taxi និង Sentra ចាប់ពីម៉ូដែលឆ្នាំ ២០១៣ ដល់ ២០១៤ រួមទាំង Infiniti Q50 sedan និងQX60 ឆ្នាំ២០១៤ ផងដែរ។ ការប្រមូលនឹងធ្វើឡើងនៅខែមេសាខាងមុខ។

នេះជាលើកទី២ហើយ ដែលរថយន្តរបស់ Nissan ជួបបញ្ហានេះ។ បើតាមការឱ្យដឹងពីរដ្ឋបាលសុវត្ថិភាពចរាចរណ៍ផ្លូវគោក NHTSA បង្ហាញថា បញ្ហានេះបានបណ្ដាលឱ្យមនុស្សពីរនាក់ស្លាប់ ព្រោះរថយន្តមិនលោតពោងសុវត្ថិភាព៕

ដោយ អ៊ុំ សុភក្តិ
ប្រភព៖ Inautonews