nVidia​ ធ្វើ​អោយ​កក្រើក​ពិភព​ក្រា​ហ្វិច​ទៀត​ហើយ​ ជា​មួយ​នឹង​ GPU​ GTX​ Titan​

nVidia ធ្វើអោយកក្រើកពិភពក្រាហ្វិចទៀតហើយ ជាមួយនឹង GPU GTX Titan

Wow Wow ពិតជាអស្ចារ្យខ្លាំងណាស់ដែល nVidia កាលពីម្សិលមិញបានធ្វើអោយកក្រើកអស់ពិភពក្រាហ្វិចកាតកំពូលៗក្នុងលោក ដែលប្រធានក្រុមហ៊ុន nVidia លោក Jen-Hsun Huang បានបើកប្រកាសចេញលក់ កំពូលក្រាហ្វិចកាតស៊េរីថ្មីកប់ស៊េរីដែលមានឈ្មោះថា GTX Titan Z វាមានសមត្ថភាពខ្ពស់ហួសពីការស្មាន និងត្រូវបានចាត់ទុកជាប្រភេទ High-end កាតរបស់ nVidia នាពេលបច្ចុប្បន្ន។

nVidia GTX Titan Z គឺជាប្រភេទបន្ទះក្រាហ្វិចកាតដែលមាន GPU ប្រភេទ GK110 ចំនួន 2 នៅលើបន្ទះកាតតែមួយវាមានកម្លាំងស្មើនឹងGTX Titan Black Edition ចំនួន 2ដើមរួមគ្នា។ លើសពីនេះទៅទៀតវាត្រូវបានបំពាក់មកជាមួយនឹង Stream Processors ឬ CUDA Cores ដល់ទៅ 5760 មាន TMUs 480 និង ROPs 96 ដែលធ្វើអោយវាមានសមត្ថភាពពិសេសក្នុងការបញ្ចូនក្រាហ្វិចធំៗបានយ៉ាងរលូនបំផុតគ្មានគូប្រៀបឡើយ។ ចំនែក Memory Interface គឺ 384-bit x 2 = 768-bit និងមានទំហំមេម៉ូរីធំកប់ស៊េរីដល់ទៅ 12GB ប្រភេទ GDDR5 នៃ VRAM ដែលមានល្បឿន Clock Speed 7000MHz បង្កអោយវាមានសមត្ថភាពគ្រប់គ្រងក្រាហ្វិចបានផុយៗ និងអាចអោយអ្នកប្រើប្រាស់ភ្ជាប់ទៅកាន់ Monitor បានច្រើនដោយមិនមានល្បឿនរអាក់រអួលឡើយ។ nVidia ក៏បានបញ្ជាក់ប្រាប់ទៀតថា GTX Titan Z នេះអាចអោយយើងភ្ជាប់ទៅកាន់ Monitor ប្រភេទ 5K ដែលមានកំរិតរូបភាព (5120 x 2700) បានយ៉ាងងាយស្រួលបំផុត បើទោះបីជាប្រើប្រាស់កម្មវិធីកាត់តវីដេអូ Design ឬលេងហ្គេមមានក្រាហ្វិចធំៗផុតលេខក៏នៅតែរហ័សគ្មានគូប្រៀប។

(ប្រធានក្រុមហ៊ុន nVidia បង្ហាញ GTX Titan Z)

ដោយសារតែវាមានសម្ថភាពខ្ពស់ឥតគណនាបែបនេះ កម្លាំងភ្លើងដែល GTX Titan Z ទាមទារក៏ខ្លាំងក្លាផងដែរ សម្រាប់ nVidia ក៏មិនទាន់បានប្រកាសថាវាស៊ីភ្លើងកំរិតណានោះទេ តែយើងអាចសន្និដ្ឋានថាវាស៊ីភ្លើងខ្លាំងជាង 250W ដែលតម្រូវអោយអ្នកប្រើប្រាស់មានដុំ Power Supply កប់ស៊េរីផងដែរ ដើម្បីប្រើប្រាស់វាបាន។ ចំនែកតម្លៃគឺពិតជាធ្វើអោយយើងម្នាក់ៗចុកឈាមខ្លាំងមែនទែន នោះក៏ដោយសារតែវាមានតម្លៃថ្លៃកប់ពពក ដែលវានឹងត្រៀមដាក់លក់ក្នុងទីផ្សារក្នុងតម្លៃ 3000$ ជាមួយបន្ទះ VGA កាត 1 ដើម។