ដឹង​អត់​សុភាព​បុរស​ក្លែងក្លាយ ជា​មនុស្ស​ធុន​ម៉េច?

ដឹងអត់សុភាពបុរសក្លែងក្លាយ ជាមនុស្សធុនម៉េច?

អង្គុយពីរនាក់ស្ងាត់ៗ កញ្ញា លីតា និងកញ្ញា ស្រីនាង កំពុងជជែកគ្នា ពីសុភាពបុរសក្លែងក្លាយ “បុរសសាមញ្ញៗដូចមិនសូវព្រួយបារម្ភ ប៉ុន្តែអ្វីគួរឱ្យបារម្ភ គឺសុភាពបុរសក្លែងក្លាយហ្នឹង”។ ចង់ដឹងអត់ថា តើបុរសក្លែងក្លាយជាមនុស្សធុនណានោះ?

កញ្ញា លីតា និស្សិតធនាគារឆ្នាំទី១ នៃសាកលវិទ្យាល័យជាតិគ្រប់គ្រងបានលើកឡើងថា សុភាពបុរសក្លែងក្លាយជាបុរសមានពុតត្បុតច្រើន នៅមុខនារីខ្លួនស្រលាញ់ ធ្វើឯងនិយាយល្អ ធ្វើល្អ ផ្ទុយទៅវិញខាងក្រោយខ្នង ជាព្រាននារី។ មិនតែប៉ុណ្ណឹង ចូលចិត្តធ្វើចរិតឯងឡូយ ខ្លាចចាញ់គេ។

ចំណែកមិត្តភ័ក្តិលីតា កញ្ញា ស្រីនាង បានបន្ថែមថា “សុភាពបុរសក្លែងក្លាយ ជាបុរសពូកែអួតអាង ធ្វើឫកអឿ ហួសពីការពិត។ មិនតែប៉ុណ្ណោះ ជាមនុស្សសន្យាធ្វើមិនបាន និងជាមនុស្ស ដែលធ្វើខុសខ្លួនឯងសោះមិនទទួលខុសត្រូវ បែរទម្លាក់លើអ្នកមិនដឹងអី”។

ស្រដៀងគ្នានេះដែរ កញ្ញា ដាណា និស្សិតធនាគារឆ្នាំទី៣ សាកលវិទ្យាមួយក្នុងទីក្រុងភ្នំពេញ ចង់សំដៅលើបុរស ដែលនៅមុខស្រីៗ ធ្វើឫក្សពារនិងនិយាយស្ដីម៉ាបេន របៀបចេះដឹង ប៉ុន្តែផុតពីមុខ គឺខិលខូចចង់តែកេងចំណេញ។ អ្នកខេត្តកណ្ដាលរូបនេះបានបញ្ជាក់ថា “អ្នកចូលចិត្តនិយាយដើមប្រុសគ្នាឯង ក៏ជាសុភាពបុរសក្លែងក្លាយដែរ។ នៅជាមួយអ្នកនេះនិយាយពីអ្នកនោះអីចេះ នៅជាមួយអ្នកនោះ និយាយពីអ្នកនេះអីចេះ ខ្លួនឯងត្រូវរហូត”។

“បើសម្រាប់ខ្ញុំ ជាបុរសចូលចិត្តធ្វើឫក្សពារ រំទំ សុភាព និយាយដឹងសុខត្រូវ ពេលនៅចំពោះមុខនារីៗ ប៉ុន្តែក្រោយខ្នង ជាមនុស្សក្រឡេចក្រឡុច ឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ។ និយាយឱ្យចំ គឺជាព្រាននារី មុខក្រាស”។ នេះជាសម្ដីរបស់កញ្ញា ស្រី និ សិស្សថ្នាក់ទី១០ នៃវិទ្យាល័យផ្សារដើមថ្កូវ។

ពាក់ព័ន្ធនឹងប្រធានបទនេះ យី ស៊ុងទ្រី និស្សិតឆ្នាំទី១ផ្នែក IT នៅសាកលវិទ្យាល័យភូមិន្ទភ្នំពេញន្ថែមថា “ចំណុចមួយទៀតនោះ គឺពេលដើរញ៉ាំអីជុំគ្នាជាមួយមិត្តភ័ក្ដិប្រុសៗមិនដែលចង់ចេញលុយទេ ប៉ុន្តែបើញ៉ាំជាមួយស្រីៗ អស់ប៉ុន្មានអស់ទៅព្រោះខ្លាចខ្មាសគេ”។

យ៉ាងណាមិញយុវជន ង៉ែត សារី អាយុ២០ឆ្នាំ និស្សិតទេសចរណ៍ឆ្នាំទី៣ សាកលវិទ្យាល័យជាតិគ្រប់គ្រងបង្ហើបថា “ពេលនៅក្នុងចំណោមមនុស្ស ពិសេសជាមួយស្រីៗ សុភាពបុរសក្លែងក្លាយចូលចិត្ត ធ្វើចរិតរំទំ សុភាពរាបសារ បែបប្រុសស្អាត។ មនុស្សធុននេះ មិនខុសអីពីព្រាននារីទេ”៕

ចុះប្រិយមិត្តអ្នកអានវិញ មានអ្វីចង់បន្ថែមលើនេះអត់?

អត្ថបទ៖ អ៊ុំ សុភក្តិ