Lionel​ Messi​ អាច​នឹង​ត្រូវ​លក់​ចេញ​ពី​ក្លឹប​ Barcelona

Lionel Messi អាចនឹងត្រូវលក់ចេញពីក្លឹប Barcelona

ឥឡូវនេះកិច្ចព្រមព្រៀងតម្លៃខ្លួនដ៏មហាសាល២៥០លានផោនរបស់កីឡាករ Lionel Messi ទំនងជាត្រូវជាប់គាំងហើយ ក្រោយពេលដែលកីឡាករអាហ្សង់ទីនម្នាក់នេះ បាននិយាយដោយខ្លួនលោកផ្ទាល់ ថាលោកអាចនឹងត្រូវគេលក់ចេញពីក្លឹបBarcelonaនៅរដូវកាលក្តៅខាងមុខនេះ។

បញ្ហាចោទនោះ គឺសមាជិកគណៈក្រុមប្រឹក្សាភិបាលក្លឹប Barcelonaយល់ឃើញថា កីឡាករម្នាក់ នេះហាក់ដូចជាមានតម្លៃខ្លួនខ្ពស់ពេកហើយសម្រាប់ពួកគេ ហើយ Lionel Messi ដឹងខ្លួនច្បាស់ផងដែរ ចំពោះករណីនេះ ដូច្នេះហើយទើបលោកយល់ឃើញថា ភាពស្ទាក់ស្ទើររបស់ក្លឹប គឺជាដើមហេតុតែមួយគត់ ដែលធ្វើឲ្យកុងត្រាថ្មីរបស់លោកត្រូវជាប់គាំងបែបនេះ។

សូមបញ្ជាក់ តារាស៊ូពើស្តាម្នាក់នេះ នៅមានរយៈពេល៤ឆ្នាំទៀតនៅក្នុងកិច្ចសន្យាបច្ចុប្បន្នរបស់ លោក ហើយខណៈនោះដែរ ក្លឹបអ្នកមានរបស់បារាំង Paris Saint-Germain មានគោលបំណងចង់ ចំណាយលុយ២០៥លានផោន នៅក្នុងការទិញផ្តាច់របស់កីឡាករវ័យ២៦ឆ្នាំម្នាក់នេះ។

ទោះយ៉ាងណាក៏ដោយ Lionel Messi ចង់នៅបន្តលេងជាមួយក្លឹប Barcelonaរហូតដល់លោក យល់ឃើញថា វាល្មមដល់ពេលដែលលោកត្រូវវិលត្រឡប់ទៅកាន់ស្រុកកំណើតនៅអាមេរិកឡាទីនវិញ ហើយ តែវាមិនមែនជាការសម្រេចចិត្តរបស់លោកតែម្នាក់ឯងនោះឡើយ។

តែផ្ទុយទៅវិញ ប្រធានក្លឹប Barcelonaលោក Josep Bartomeu មានទស្សនៈខុសគេឯង ដោយលោកចង់ចងសម្ព័ន្ធភាពជាមួយ Messiរហូតដល់កីឡាករម្នាក់នេះប្រកាសចូលនិវត្តន៍ពីបាល់ទៀត ដូច្នេះហើយការចង់បានតម្លៃខ្លួន២០.៥លានផោនក្នុង១ឆ្នាំ នឹងជ្រាបកាន់តែច្បាស់នៅក្រោយការប្រកួត World Cup២០១៤ខាងមុខនេះ ដែលប្រារព្ធឡើងទៅនៅថ្ងៃទី១២ ខែមិថុនា ក្នុងប្រទេសប្រេស៊ីល៕